2013年好快就過去，都係時候回顧一下夏體硬今年柒件大事。
壹 夏體硬首奪記協盃 成立於06年夏季o既夏體硬，參戰記協盃多年，亞、季、殿軍都拎過，就係差個冠軍，今年終於打破宿命，決賽大勝對手3：0，以不敗戰績封王。美中不足係射手強仔o係決賽被人踩心口之後，竟然被球證紅牌趕出場，對手更疑似輸唔起，拉隊離場，事後記協竟然不予追究又不用停賽，識波之人笑爆咀。 
貳 港隊將帥加盟 夏體硬o係國足主麾下多年無冠，今年多得富足主出馬，成功搵到前港隊教練陳小明同埋門將高超加盟，繼續以班霸姿態逐鹿中原。新一年將繼續有名將加盟，論在港名氣一定大過o個個咩雲頓同埋乜乜莊臣，各位球迷拭目以待。至於，其他白撞o既退役運動員，請慢慢等通知啦。 
叁 新贊助商全力支持 除o左同NIKE簽o左賣身契之外，亦有各式各樣贊助商與富足主接洽，年頭就成功斟得內衣品牌JOCKEY贊助夏體硬，取代o左陳七同Peter o既代言人地位。至於贊助商要求全隊一齊拍o既宣傳照，就因為各隊員o既減磅計劃仍在進行中，宣布無限期押後……
肆 多名隊員成家立室 結婚係戀愛o既墳墓，偏偏今年有多位隊友唔識死。年頭有劉安迪、年尾就有雷蒙威同埋5+HIM，仲有另一位就話要保持秘密；新加盟o既高超亦都做o左老豆。至於國足主同富足主就因為心繫會務，暫時未有著落，各位如果有好姊妹介紹，可以打個電話或者腥個email畀人事部約見，可樂暉會scan一scan先。（C cup以上優先） 
伍 黑龍波可樂暉慘被掛牌 由於港視未獲發牌，名滿中外體記圈子o既祝福大師黑龍波，忽然變成失業大軍，亦因此喪失o左參戰記協盃資格。同佢同一處境o既，仲有已離開呢個圈子o既可樂暉，一下子冇o左兩名門將，搞到國足主都話可能要改為守龍，以保住正選位置。 
陸 阿Ron獲金像獎提名 入得o黎夏體硬o既都係猛人，已經轉戰電影圈o既阿Ron，今年就憑《消失的子彈》，獲得第三十二屆香港電影金像獎最佳剪接提名，可惜最後未能獲獎，令到「多謝夏體硬栽培」呢句說話未能在台上出現。不過點都好，今次提名對阿Ron已經係好大鼓舞，最新作《風暴》現已上畫中，國足主就考慮緊請晒大隊入場支持，加油啊陳忠明！ 
柒 國足主惡行昭彰 國足主呢幾年隻手遮天，已經令到唔少隊友有微言，今年球隊捧盃後o係貝生間百樂門大搞慶功宴，筵開四席，廣邀多年來支持過球隊o既贊助商同埋球員食餐好，點知國足主屁股痕癢話要搞大抽獎，結果用o左幾叉0野買埋o的唔啦更o既玩具，抽中o既賓客唯有大嘆唔好彩。 
富足主