【運動員網誌】我打咗好多，發覺原來我都係講咗好少（吹水佬）.…..如果覺得想聽埋落去，睇大家反應啦。
琴日腳痕忍唔住，著住跑鞋唔熱身去示範下。然後今日見腳唔痛就分享下自己點睇自己起跑，然後做下紀錄。
首先我都係喜歡用10米睇一個起跑動作，因為貪佢有個黃勾既線，易去睇件事，同出面比賽嘅片都易去比較。
首要我有兩大原則。
- 頭10米要有一個理想嘅步數
以我為例，我係會用頭10米7.5步起完成10米。每個人身高，手腳比例唔同，身體關節支點發力時間有長短之分。1米9高易做7步但頻率會慢，相反1米6頻率會較好但頭10米有8步都要接受。頭10米要跑幾多步通常我會首先取決於第二個原則，再調整每步嘅動作。
- 頭7步是否自然暢順地完成
PK唔在講，身體角度會否變化太大，會否大細邊唔平衡，途中太急用力加速等等都會影響身體喺地心吸力嘅前題下製造動力。動作夠自然某程度暗示動作嘅速率會較好，力量嘅分揮都會較強，頭10米都會明顯做快啲之餘，最重要係Drive Phase到Transition Phase再到Take Off會更容易達到最高速。
睇番我跑嘅片段（正常片速），會明顯睇得出我左右腳唔平衡，動作速率會大受影響。再睇慢鏡右腳Push同左手擺向後動作明顯幅動唔理想，導致大細邊。
在 Instagram 查看這則貼文
其他一啲做得唔好嘅地方，等你哋話我知，費事踩到自己一文不值。
好多短跑人，以我觀察下，有兩個共通嘅盲點。
一、太追求感覺。特別係一個人去試嘅時侯，起跑就等於一個Power Clean嘅動作，每個手腳身要有細緻嘅技術，角度同充份嘅幅度，充分嘅速率先會令速度體現出來。只從感覺上去行事，你只會搵到你嘅極限，但搵唔到突破。
二、太追究單一嘅條件。我會好喜歡問短跑人，起跑最重要其實係為乜，唔係第一下嘅反應，唔係個角度有幾靚，亦都唔係我啱啱所講頭10步應該點。
最重要係你能否以最短距離可以達到最高速。加速Acceleration – 應該係一步接一步，每步比上一步快直到你最高速。所以如果太拘泥於起跑係咪某一個角度喺某一個線條，最後忽略整體60米嘅加速，都未必係一個最理想嘅起跑。
文：黎振浩
前香港男子100米紀錄保持者
男子4×100米香港紀錄