【專欄投稿】帶隊10年，大大小小的排球賽事都參與過，聯賽、馬拉松、區賽、學界、大專、工商盃、港運會、全國賽、亞洲賽等等…….，在成年人的隊伍中，每年聯賽是最艱巨的賽事，而在青少年的區域中。全年最難打的一個學界賽事，我相信一定係全港學界精英賽。在自己的教練生涯中有幸8次穿梭這個至高無上的賽事當中，雖然曾帶領過聖傑靈奪過一次殿軍及一次季軍的成績，但覺得呢一個已經係我人生中最高峰的學界成就，莫講話決賽，就連四強之列都已經無再去諗過，至於冠軍……發白日夢既時候就有試過諗。但……今年，我竟然可以帶領到另一班小妹妹奪得呢個學界至高榮譽既冠軍，到而家我仲未敢相信我真係可以做得到。
3年前因一個機緣巧合半推半就的機會之下，經好拍檔（阿清）介紹我接觸迦密聖道中學女排負責老師（Miss楊），協助幫佢女排既訓練，還記得第一次同班學生在學校英語室見面時，問佢地想要打開心歡樂的興趣班？還是要想要取得某一些成績？佢地不約而同地講出兩個答案：1. 想攞大北冠軍；2. 想試吓打精英賽。當時我細心看看佢地個人身體素質後……..，我只是輕輕地笑著講一聲好呀，咁你地會好辛苦喎，同埋練習出勤要好足先得，而且除咗一星期兩日練習之外，仲要額外加操體能。呢個時候，我諗佢地應該無諗過原來要衝兩個目標係要付出咁多時間。
第一年在練習期間，起初總會有人話因為中六要補課嚟唔到練，又會話身體唔舒服而嚟唔到，連體能練習都只得幾個出席，所以該年的甲組賽事八強出局，乙組四強賽事再次敗於宿敵之下，最終只能奪一面銅牌。
經過一年的洗禮之後，大家終於明白到不能見到曙光才努力，應該要努力去搵曙光。第二年的練習，大家變得非常積極，雖然有人會捱唔住而退隊，但留低既都硬著頭皮地一步一步咁向上爬。結果，甲組衝金成功，奪得失落多年的大北冠軍，同時亦攞到精英賽入場券，但可惜精英賽16強在領先之下因心急而反勝為敗，錯失一次難得八強機會，而乙組更因為懶散的練習導致八強出局。不過，雖然一連兩個重擊直接打落她們身上，但她們並沒有放棄到，相反越跌得痛，越懂得醒覺。
於是由暑期7月開始，除咗要跟家人回鄉探親之外，佢地連旅行都唔去，差不多日日都在排球場中渡過，這些練習要求全出於佢地自發性，就連去台北集訓都係佢地一手一腳去搵機票、住宿及交通安排，我只係搵隊伍同佢地打，係台北五日四夜，足足打咗32局高強度友誼賽，其實呢個集訓佢地的確提升咗好多，但我唔想佢地自滿，所以一有咩做得唔太好，我總會諸多挑剔，我知道佢地好難受，但我更知道我絕對唔可以手軟，一念天堂就會一念地獄，去到最後一日佢地都打到喊，點解好似做極都做唔好咁，見到佢地咁，自己都忍唔住眼濕濕，唯有走出體育館望吓花草樹木，深呼吸一下後，回頭再對佢地嫌三嫌四。
終於踏入9月，學界終於來臨，但學界分組上我們只需要打一場就直入16強，其實咁樣佢地會好缺乏比賽經驗，但幸好佢地能夠殺入最後決賽，再向宿敵挑戰。最終突破宿命，戰勝宿敵並成功衛冕大北冠軍。而下一步就是備戰精英賽，但經過抽籤後，我地被抽中死亡之線，24強就要對筲官（筲箕灣官立中學），如果入到16強就要對荃官（荃灣官立中學），再衝到上八強既話就要對港九D1皇者鄭裕彤（順德聯誼總會鄭裕彤中學），如果又好好彩轆到入四強就要對衛冕冠軍的英華（英華女學校），條線簡直靚到一個點。但都無辦法啦，既然抽籤我地控制唔到，我地不如做d我地可以控制到既野吧！！積極練習及約友賽，正當準備好部署之際，突然收到學體會一個極度撲索迷離既重新將新界區抽籤的通知，而且係已經唔知幾時重抽的決定，結果新既抽籤條線更加嚴峻，地獄17層跳落18層，24強對沙排D1冠軍鄧肇堅（聖公會鄧肇堅中學），16強就要對衛冕英華，去到呢度已經唔諗之後d野啦，當時佢地問我點算，我只可以答佢地諗咁多都無用，死唔去既話先再一日一日咁諗啦，場場都當自己打大佬，過得一關得一關，隨遇而安，逆流而上吧！！
結果24強在有驚無險下險勝鄧肇堅，多謝輝sir及Andy sir的祝賀，但大家都知道面對英華都只得一個答案……。
16強對英華係我最唔想對既球隊，唔係因為要對衛冕隊伍，而係識英雄重英雄（細好），兩隊都值得再走多步才相遇，最終我地能晉身八強，賽後細好更祝福我地要嘗試再走遠d，俾多d人知道大北球隊都可以係爭標份子，唔好浪費咗呢場勝仗。
嚟到八強，又要面對元朗冠軍白約翰（聖公會白約翰會督中學），比賽初段差d俾佢地發球衝散，幸好佢地頂得住，死頂都頂得返上嚟，但就消耗咗好多體力，賽後好感謝家欣讚佢地進步神速，越打越有球味。
衝過八強目標，終於可以奪得一面獎牌，但係咩顏色？先要過到港九D1冠軍皇者鄭裕彤呢關先知。賽前同恩師小良sir傾計想減吓壓，佢問我會點部署及有咩目標，我二話不說就話想試吓走入決賽，但佢即刻當頭棒喝叫我千萬唔可以咁諗，佢話連我呢個身經百戰既教練都想入決賽，你臨場指揮及佈陣一定會受影響，而且班球員既壓力會比我更大，還有連日來「黑馬」的報導，一關又一關咁過，由下風變成上風，身邊所有人都會叫你地殺埋入決賽，其實球員既壓力只會越來越大。呢個時候係要用盤冷水淋醒自己，決賽夢可以發，但唔可以恨，唔可以渴望，做返一隻低著頭死衝的「黑馬」，諗諗最初打第一場你地係想點？想要d咩？初衷係乜？點樣憑熱血逆流而上？仲記唔記得係亞少比賽時點樣失落八強後衝返個第9名返嚟？原來去到呢個時候我都會迷失，幸好有呢座燈塔（佢有1米83高）帶我走返出嚟。
結果，一班鐵血戰士將士用命，決勝局按部署下打出扣人心弦精彩的一局，尤其是帶傷紮住打既心怡，第三局兩記攔網及一記快攻，用意志力忘記傷痛。最終以 2：1 獲勝，但呢場勝仗並唔係我一個人帶佢地打，我背後多咗一名軍師相助，如果無呢個燈塔，我相信一定會跌至粉身碎骨。賽後感謝紹璣sir對一班球員的祝賀，以及讚揚佢地打不死的精神。
來到終極大佬協恩，港九D1亞軍，亦是精英賽常客，更曾奪得冠軍的強隊，大家都以發球防守作最強武器。賽前唔再敢諗攞冠軍，只想做回一頭「黑馬」，幸好呢班學生竟然只同我講一句，盡最大努力去打，打死罷就。真係好熱血，一班不怕死的敢死隊，仲癲過我。雖然在第二局有點放鬆，但幸好第四局大大力加鞭之下，佢將佢地所有潛能谷晒出嚟，結果……我地成功啦！唔覺唔覺走咗上學界最高榮譽的頂峰，真係只有發白日夢先會見到既情境，太不可思議啦！！賽後非常感謝林sir的讚賞，認同我們的部署及搏晒老命個種熱血精神。
一連五日既精英賽終於都完滿落幕啦，好多謝呢班女帶我嚟到呢個舞台，而且係你地賜予我冠軍教練呢個榮譽，回想當初你們的技術只有曉諾比較紮實，謝麗霖比較好之外，其餘所有人都真係……（不敢想像，因為十居其九都係由一張白紙造起），但去到今時今日你地已經脫胎換骨，最佳發球、最佳二傳、最佳攔網、最佳攻擊、最佳防守、學界明星隊，其實呢d並唔係我既功勞，係你地肯練肯捱而得到既脫變，如果你地唔肯下苦功，就算叫郎平嚟教你地都無用，所以你地先至係我呢個冠軍教練既守護神，還記得四強時同你地講，你地有咩都唔駛怕，有我承托住你地，你地只需要好好保護我呢個逆流大叔就得啦。多謝你地敢陪著我一起去發呢個白日夢，低著頭一關一關地走上去，只要唔放棄，肯堅持，就算結局唔完美也好，都總算對得起自己。世上沒有不可輸的比賽，只有輸得是否值得。要多謝既人實在太多，真的不能盡錄，打漏咗請唔好介意……。
Wing Yee Yeung，如果當日你無搵阿清搵我，我諗我一定唔會入嚟大北，而且你係我地最強既後盾，所有校務事項一手包辦。
Pudding Ay，有你不時幫我頂住幫佢地練習，如果無咗你，我諗佢地又會變成孤兒仔啦！！
Ching Tse，如果當日我唔應承你幫你師姐手，應該唔會有呢一日啦，仲有係決賽時你不停幫心怡心理治療，令佢夠膽再上戰場。
曉諾爸爸 Chi Ming Ricky Cheung、媽媽、哥哥，好感謝你地身體力行去支持整個球隊，去台北時仲幫手租車，免息口兌換現金係最無敵的。
助教團師兄 Michy, Bonnie, Mak Ling，最後階段陪打陪練陪住一齊叫，嗌到聲沙，作出最強back up。
Yau Yu，一直很喜歡你帶隊時的忘我演繹，今次終於可以試吓用係自己身上啦，同埋不時向你問吓教學心得，你教咗我好多臨場指揮既野。
Jason Mak，你呢個拍檔真係唔可以唔提，係你令我改變咗帶隊風格及練習模式，同埋敢於嘗試。
Erica Chow，識英雄重英雄，我有好好記住唔可以浪費咗你既心血。
倪震權，多謝你借出長天子弟兵跟呢班小妹妹打友賽。
Paymond Pang，既係老友又係敵人，教學雙長，一齊為大北爭氣。
恩師小良，我既人生燈塔幕後軍師，不致令我迷失更帶我重回正軌，而且帶我登上頂峰，如果有最佳教練獎，你才是實至名歸的最佳金牌教練，無你無我。
香港01 Benson Chui、體路 Faye Chui、Carrie Tsui、四面體 Ka Ching Wong、講波佬 Patrick Hui Pui Tak、Kaji Tam、阿陶，我要好好向你們一班專業體記致敬。
一班聖道最強打氣團既老師、同學、家長、校友，你地形成好大既氣場，將比賽場變成我地既主場。
Johnny仔，我地指定攝影師，病咗都照嚟幫我地影相。
旭青打氣團，做咗一日聖道校友，但間學校係邊都未知。
最後就係要感謝呢班黑馬兵團，曉諾、謝麗霖、端、長頸鹿、心怡、黑炭頭、紀慧妍、橙皮、茜茜、羅羚、豬肉、雅婷、瑤、范芷翹、蘇曉澄，你地既堅持無白費到，你地相信我呢位逆流大叔帶著你地逆流而上，創造出一個又一個的奇蹟，做到咬著牙關過，當初的我創造我，拼了所有，斷氣方休，無憾了。
#不要見到曙光才努力 #要努力去尋找曙光
#世上沒有不可輸的比賽只輸得是否值得
#大將之風不是能力是態度
#不要一直只追趕他人的尾燈 #要走自己要行的路
#想贏怕輸只會輸 #遇到困難向前衝
#不要不停找藉口安慰自己 #勇於走出安舒區
#咬著牙關過當初的我創造我
#拼了所有斷氣方休
#不要放棄 #要堅持 #要熱血 #打場感動他人流淚的比賽
#世上沒有長勝將軍亦沒有永敗之師
#就算只是曇花一現也好都想你們像煙花一樣燒得燦爛
#棒球有Kano點五步 #排球有聖道
文：逆流教練 寶林sir
圖：體路資料庫