今屆記協盃將於下個月開鑼，雖然夏體硬一向嚴格執行入隊審查，逢係靚仔過國足主、又或者條頸硬過富足主呢o的，一律要過主，但係由於參賽人數有限制，作出取捨在所難免，國足主呢排就為選人而煩惱。不過佢同富足主都有個共識，就係唔理你有冇大報或大台背景，只要係恆常出席練波同埋球隊活動，就會有得入選，透明度絕對高過港隊選人，一定唔會順得哥情失嫂意。
夏體硬成軍在即，亦係時候公布一下我o地件新戰衣。新一季我o地會繼續同NIKE合作，早前經過內部投票之後，就選定o左一件紫色戰衣。資深o既球迷可能知道，夏體硬成立咁多年，幾乎咩色波衫都有，就係差隻紫色。
如果大家咁諗都唔係錯哂，但係o係富足主心目中，「紫」色更深層o既意義，可以當係懷念一下我o地o既四號門將「子龍」。綽號黑龍波o既佢，最近成為電視發牌制度下o既犧牲者，至於佢仲可唔可以出戰記協盃，就有待再有關方面再研究。
最後講番o的開心o野，夏體硬上屆首奪記協盃，家住元朗既富足主就獲封為榮譽市民，有關方面仲想話畀條街我冠名，不過富足主向來唔鍾意出風頭，於是就借花敬佛，由國足主執二攤頂上。國足主前幾日已經入o左去「領獎」，大家下次入元朗睇波，不妨都行過去參觀下啦。
富足主
