【體路專欄】所謂「冇得輸」，唔代表你一定唔會輸，而係你有一種打甩門牙和血吞嘅精神，死就死，衝咗先算，輸都要輸得無悔。而且你深知，每一次輸，都係贏嘅開始，當你失望傷心自怨自艾嘅時候，抬頭望吓身邊隊友同親友，佢哋雖然無落場，但精神一直與你同在，一句吶喊、一抹笑容、每個眼神、每個擁抱，都係你最好嘅燃料，令你再次燃燒自己，抱住「冇得輸」嘅精神，嚟一場漂亮嘅「逆轉勝」！
當上星期大球場40,000球迷為咗坐響冷板櫈嘅美斯鼓噪之際，無幾遠嘅伊利沙伯體育館內，其實上演咗幾場極級精彩嘅學界籃球賽事。有幾精彩？作為大會攝影師的我，幾乎破紀錄地兩日八場賽事影咗700GB file 50,000格相！係咩吸引我狂㩒快門？咪就因為畀呢班年青球員團火焫着咗我囉！
而家諗返，真係火頭處處：
1）北角協同中學由D3打到上D1，四強戰輸完畀男拔後一啲都無洩氣，季軍戰對漢華，完全係打死罷就嘅戰鬥格，強敵當前不退不讓，最後以3分險勝，創學校史上最佳成績。賽後隊長黃頌文接受傳媒訪問就話：「昨天四強輸給男拔後大家都沒有沮喪，現在我很難形容我的心情，應該是興奮，因為這是歷年來最好的成績。雖然我今天表現不好，這個季軍是隊友一起努力的成果，可以說是隊友送給我最好的禮物。」
2）總決賽男拔、英華宿敵夢幻對決，戰情緊湊，雙方多次平手，最後全隊着晒火嘅英華以91：64力挫男拔，事隔七年重登王座，捧盃一刻，場內場外都開心到癲咗。失去過，先真正感受到得到嘅喜悅。
3）女子隊林大輝對女拔萃於四強一戰上，落後之下逐分逐分追上去，簡直係「逆轉勝」嘅最佳演繹。
4）英華嘅蔡浩東，直頭係港版艾佛遜，細細粒速度快3分準，真係睇到人血脈沸騰。
講咁多，其實都真係想話畀大家知，香港好多年青運動員都好努力好搏命，我唔敢講將來佢哋會唔會有美斯嘅成就（邊個知呀！嘿！）但佢哋嗰種打甩門牙和血吞嘅運動員精神，堅係值得香港人支持同珍惜。
圖、文：攝影師 Brian Ching 程詩詠